2月21日Donald & Carol 結婚之囍

一如既往, 每次出席朋友既婚宴, 都有好多所見所聞, 想同大家分享, 今次, 係老表名師結婚, 當然亦不例外啦!

已經做過好多次兄弟, 事實上, 我覺得過程都係大同小異, 不過, 我想指出每次做兄弟, 晨咁早起身, 心情都係興奮, 今次名師兄弟名單中, 除左我, 仲有Kong, Larry, Prof. Wong, 自閉仔, 南哥...無何否認, 又係星級陣容啦, 當然, 阿揚係度既話, 就更完美了!

7:45 a.m. 大家都準時到達烏溪沙, 新朗哥名師, 一個字, "好型", 係呢個時候, 攝影師都會叫新朗哥介紹下d兄弟, 同埋叫d兄弟講番幾句說話, 講感受, 簡直開正我個瓣, 之前都已經度左講咩架啦, 因為知道冇好似立法會俾議員七分鐘咁多時間, 所以唯有字字皆精, 同埋, 以Democwall 成員身份, 唱左兩句送俾名師, 哈哈, 個首歌確係唱出我心裡感受, 一日老表, 一世老表!

接新娘, 玩遊戲, 呢一part 就相對平淡, 或者係我地太過活躍, 不消一會, 就成功過關啦, 阿師取得美人歸, 呢一part, 又係感動位, 過程雖簡單, 意義卻好重要嗎...

係註冊過程中, 有一件趣事, 當時有兩位職員, 其中一位應該係助理啦, 負責瑣事, 儀式開始時, 全場寂靜, 大家都凝望著一對新人, 好啦, 個位助理, 往常地, 提高聲浪, 字正腔圓, 說出...「而家, 有請一對新人, 鳩換戒指!」....huh!? 鳩換戒指? 同黃興桂講倒掛鳩鈎, 蔡育瑜講足金鳩猴一樣, 超爆笑呀! 當然, 係呢個咁莊嚴既場面, 梗係唔可以笑左出黎啦, 之不過, 我、小雞, 同埋大飛都忍笑忍得好辛苦呀~~不過, 個位助理, 係呢個moment走音, 又真係估佢唔到啦~~

婚宴係聘珍樓舉行, 對於擺十幾位既婚宴, 其實地方也蠻不錯呀, 當晚, 我同Larry負責做MC, 呢次係繼上次江仔 and Tammy既婚宴後, 我地第二次拍檔做MC, 我地份script 係一早準備好, 不過, 大家唔好誤會, 唔係好早之前準備, 係當日一朝早準備呀, 哈哈, 其間, 我地不停修改, 不停加入新原素, 眼見個場有鋼琴, 我地就叫個琴師幫我地彈段"分分鐘需要你", 然後, 我地就唱幾句做opening 啦, 想不到賓客反應出奇地好, ...不過, 因為我地練得不夠, 結果唱左兩嘴後, 竟然唔幾得接著講嘜, 之前, 雖然講過大家亙補, 攪笑既係, 我同Larry當其時, 一齊都唔記得講嘜, 結果...er er er....er 左一陣, 先記得番, 雖然如此, 氣氛還是不俗, 因為拍檔Larry 出色之處, 在於他的表情和動作, 加上他臨場爆肚...在場的賓客, 相信都聽得投入啦, 聽說當晚有一位女賓客 (女版 陳欣健 + 唐英年 ), 深深俾Larry 既說話所感動呀~~好羨慕呀~

名師係婚宴講個幾句說話, 真係既感動又搞笑啦, 講得好全面, 我相信他話中提到既人, 當時人聽到, 一定好窩心, 好感動啦, 佢講Lot Index Plan 個件事, 婚宴前, 我同Larry 都叫名師一定要講啦, 畢竟, 呢件事, 不只搞笑, 最重要係表達到名師對Carol, 對佢屋企人既承諾嗎~

結婚後, 名師同Carol, 展開人生另一階段, 在此, 我引用當日我祝福名師個句祝福語, 祝佢同Carol 「情比金堅，堅過石堅!」

後記:

我地一班兄弟, 準備左一本精美既相簿, 送俾名師同Carol啦, Larry 仲晒左張當日係註冊處, 影既一張相 (呢個post 既第一張), 放係相簿封面, 阿哥, 呢d咪叫誠意! 還有, 阿揚人雖不在香港, 心仍繫香江, 佢準備左一張6、7 年前名師俾記者訪問既剪報, 送俾老表, 當時, 我見到老表既反應, 真係好驚喜啦, 老表有阿揚呢d咁重友情既朋友, 係福氣啦~

Photos are from Larry.