日本建磁浮仲平過香港高鐵
記得運輸及房屋局副局長邱誠武說過，高鐵就像寬頻一樣，不能再用 56K 上網，再不和大陸照軌，香港就會邊緣化云云－－這個論據到今日，都被支持高鐵的人不斷強調，常說沒有高鐵就會邊緣化，香港會變孤島。
香港高鐵段平均只有每小時一百廿幾公里，比起歐、美的高速公路還要慢；2. 國際對高速鐵路的定義，為最高速度每小時 200 公里（香港段最高只有 170 km/hr）；3. 香港仲有大把鐵路連接大陸，在沒有一地兩檢的情況下，高不高鐵根本分別不大！真係要最快，最簡單就係學上海建磁浮！
「香港高鐵」只有 26 公里，和上海磁浮示範運營線營運長度 32 公里相若，沒有一地兩檢，香港不放棄一國兩制的話，為何要「同一班車」，讓大陸人在過完邊境來慢駛呢？如果要快，點解上海可以建磁浮，而香港卻不能呢？
距離和香港高鐵相若的上海磁浮列車，最高速度達每小時 430公里；單程人民幣 50 蚊，來回只需要 80 蚊，比起香港的機場快線更平更快；如果政府說「發展第一」，其他野第二，那麼為何我們不索性興建磁浮列車呢，而要用六百七十億的驚人天價，去建造一條又慢、又落後、仲慢過歐洲公路開車的「高價鐵路」？把鬼呀？
香港班膠官成日提到日本新幹線，話係「成功例子」，但係點解人地而家「成功到咁」，都要轉磁浮呢？正如十幾年前好多學校話要建「寬頻」，10M 的 LAN 線就已經「好寬」，估唔到幾年後 100M 已經變主流，今日冇 GigaLan 都唔敢同人講一樣，點解明明已經有新技術，我地仲要畀錢買過時野呢？
我知你想講乜－－不過係磁浮更貴係唔係？錯！日本計劃興建的「中央新幹線」， 連接東京與大阪只需要一個鐘！營運速度達每小時 500 公里，根據資料顯示，單計位於東京都心底下、非常深的地下路段每公里的工程費用，最貴都只係每公里約三百幾億日圓－－YEN 喎，以今日日圓高企的匯價計算，都只不過係廿五億港紙一公里，同今日高鐵造價 670 億 26 公里，即平均廿六億一公里的造價相同！
冇錯，人地日本畀同樣的價錢，係用來興建磁浮列車，亦只有為左每小時四、五百公里的速度，為左如此合理的高速，才值得畀呢一筆咁貴的錢，走去全地底興建！香港呢？為左一條百幾公里的「低鐵」，卻跟人要「環保」全地底興建，結果就要畀最貴的價錢，買個最爛的貨返來－－又係要過兩次關卡，又係要減速停車，仲唔係最硬膠最弱智的傻仔？港燦買膠鐵－－又慢又貴！
對，既然價錢相若，點解我地要做老襯呢？大家都係廿幾三十公里，點解連上海人都可以坐磁浮，香港人卻要坐比起來係龜速慢四倍的「膠鐵」？
「報導指出，上海磁浮鐵路的造價並不算貴，鐵路總投資約一百億元人民幣（包括列車車輛），按全長三十公里來算，平均每公里投資三億多。但上海地鐵每公里的建設成本就達七至八億元，是磁浮鐵路造價的兩倍。」
這些「撐高鐵」人士，成日話上海磁浮平係因為建在地面，和香港建在地底不同－－那麼用東京來比較可以了吧？東京和香港同樣是高樓大廈滿佈，可是連東京都心最貴的路段，都只係同香港的「平均價」相若，咁點解我地唔建磁浮算數？要快，磁浮快四倍！論平，磁浮造價和高鐵相若！上海做得到，日本亦做得到，為何偏偏說上海「威脅」香港的特膠政府，卻完全不以香港人的利益為重，要畀磁浮價，買條過時又落後的慢鐵？
潮語說：「蔗渣的價錢，燒鵝的味道」，今日香港就係畀登陸火星人均四倍的價錢，去買蔗渣的速度！時速一百廿幾公里，運機場快線都做得到，點解今次要畀六百七十幾億？點解今次要用東京建磁浮先需要的建落地底？荒謬絕倫！
Ref. Link: http://plastichk.blogspot.com/2010/01/blog-post_16.html
Posts
Myspace/democwall
No comments:
Post a Comment