Set自己士碌架

梁振英僭建越來越精采，原來四號屋地底密室磚牆，屋宇署今年6月巡查發現有古怪，四度去信查詢，梁振英一於睬你都儍，從未回覆。早前他解釋指圍封後誤以為毋須通知屋宇署，大話不攻自破，因即使圍封時唔知，但6月巡查收到屋宇署查詢後，冇理由再唔知道。

錯在次次心存僥倖

他為了圓謊，一再使用「我以為、我記錯、我唔知」等小學雞理由，堂堂特首變作潑皮無賴，仲邊有公信力去領導政府。為了死頂落去，相信邵部長正開動宣傳機器，保梁一族四處出動。先有老左吳康民轉移視線力指唐營造反陰謀，可惜冇人信。係人都知唐營也瀕臨解散，投誠的也不少，唐唐遊埠多過留港，邊度有力動員泛民、傳媒追殺CY。另一種言論係放眼將來，畀機會佢為基層，大佬，香港人畀足機會佢，由今年3.25當選起計，佢凡決定都係錯，而且錯得好離譜。

CY其實係自己set自己「士碌架」，與人無尤。開局搞架構重組，信羅范搞掂，佢並非唔知擴大問責制十分凶險，但仍固執己見，將中央提示置諸不理，明顯係政治目的壓倒一切，急於建立梁粉班底安置自己人。到親自發電郵指示部門公職委任要向高靜芝滙報，死因同樣係政治冒進，急於安插自己人，結果又俾政務官「將軍」。兩件事相隔半年，換句話佢由始至終，冇吸取過教訓，如此政治水平先令中央擔心。

僭建本來冇搞到咁大，佢錯在每次都心存僥倖，選舉時「午夜凶鈴」恐嚇曾鈺成、小桃源黑金飯局、西九利益衝突，一概畀佢「耍」走，唔使上身。上得山多終遇虎，CY不明當時前線記者對佢有好感先至放生，但今非昔比，好人形象破產，再冇咁易耍走記者，結果一個大話冚一個，越解越謊腔走板，越解唔通。一切源於他認為只要應付了今日傳媒提問，耍走佢哋就OK，結果犯上了TVB電視劇同一錯誤，開鏡前冇完整劇本，靠現場飛紙仔執生，最後劇情犯駁，觀眾質疑。

最可笑係佢走到今日仲未醒，按慣例12月底應上京述職見習近平，今次不知會否又「被取消」。

添馬男

Ref.: Apple Daily