港獨是北極企鵝

人有人話，獸有獸語，若要溝通，便要使用正確頻道。要和保爺派交流，只能用保爺派的說話。

最近保爺派不斷發出「港獨病毒」一級警戒，夢熊大師甚至將倉底的「廿三條口罩」拿出來，非要把香港人的嘴巴遮蓋，隨時窒息而死。

我已說過，香港人從來沒有「獨立」的大志，只想安穩做一個殖民地，我們只想做附屬咭。這樣說吧，香港人頂多只想做搬出嚟住嘅衰仔，但我們未至於要登報紙脫離父子關係。

當然以上的說法，是人話，對方未必聽得明白，我們只能借他們的「同類」語言溝通。

阿爺，有關「港獨」的講法，完全是「子烏虛有」，比子虛烏有更子烏虛有。你哋唔鍾意我們揮舞米字旗，咪唔揮囉；你唔鍾意我哋提彭定康，咪唔提囉。但你駛唔駛炒咗佢中國人的國籍啊？駛唔駛屈我哋搞港獨啊？我都唔明白，香港人同吳克儉一樣，我哋做錯啲乜嘢啊？講兩句「我是香港人不是中國人」就當係港獨？就像陳橄欖所講，家陣搞白色恐怖啊？如果你咁樣就要23條立法，簡直就像黐樹根所講，焚書坑儒啊！借用法律謝超人撐糧尾昏的金句，阿爺你唔滿意香港人，都唔駛咁樣開我哋波㗎？都唔駛咁「上綱上線」㗎？

借用釋法魔女梁詩姑回應兩個律師會的聲明：「完全係多餘！」港獨的指控，完全係多餘。我哋都有言論自由㗎﹗

我最愛CY，他最近上立法會的一番言論，只要稍作更改，已能直接回應「港獨論」。

「香港有少數人對抗議遊行中的揮舞『米字旗』的行動，提出『港獨』、『賣國』等高度政治化的言行，會對香港與內地關係的正常發展造成負面影響。」

正是：北極有企鵝，香港無港獨。

曾志豪

Ref.: Apple Daily