大班回朝

蘋果訪問大班 ，大班實在講得好!!


元氣堂：大班回朝

時間很會作弄人。
當晨早再聽到沙啞的「康港康港」，當知道大班鄭經翰回來了。04年前被譽為「十點前特首」，呼風喚雨，闊別八年後，他創辦的數碼電台（ dbc）變得有點尷尬──2004年大班剛接觸數碼廣播時，根本沒有能上網的手機，2012年，到底誰會買數碼收音機？大班逢人鬧，但他承認有一個死穴，就是曾蔭權，他封咪八年，爭一個月就恰恰好是曾上台的八年，開咪三周日日被觀眾揶揄「你個 friend呀！」他說：「所以倒數緊㗎喇，仲有24日，哈哈！」

七個台，只求三個台掙錢
「香港山頭多， FM每個台用七條頻道，這樣就霸佔了全部 FM49條頻道。」所以，大班要開台就必須做數碼。
dbc共七條頻道，一台為大聲台，即大班開咪，又自詡為全港質素第一的電台，「一台以後會發展成純評論，即係成個台都鬧人；二台是家庭頻道，一定掙錢；三台是財經台，五台大同台做少數族裔，六七台是金曲台，不掙錢，但利用到數碼廣播的優勢。」至於第四台，本來為八十後基地的大晒台，將轉型為校園電台，「這是港台本來應做的事。有些學校好有錢，自己有 studio，我們支援他們在這裏播，這樣子培養人才，浸大理大都有校園電台的。」這個台豈不是又不掙錢？「不掙，掙錢就執到，其實一二三台掙就夠。」數碼廣播技術本出現在上世紀， dbc在2012年出生，本來時間尷尬，皆因網台風氣流行，加上人人都用手機上網，新一代習慣自由選擇收聽時間地點，加上有 archive（節目重溫）；另一邊廂， dbc發射功率未足，部份地區接收欠佳，傳聞 dbc的一直沒有加大網上收聽伺服器，就是怕聽眾習慣用手機 app收聽，乾脆不買數碼收音機，大班：「我們正在做 archive。因為本來 Morris（ dbc CEO何國輝）認為有 archive又有網，大家不會買收音機，但現在收音機已賣了一定數目，就可以做了。我們會收費，因為以前我在商台，單單加拿大就有二萬個客，一個人收$100都200萬！」

蘋：蘋果　鄭：鄭經翰（大班）
「的士佬梗係聽我」
蘋：大班，在節目中有時會聽到你呻，數碼廣播功率不足，很多地區收得不好，隧道收不到，搞 dbc是否中伏了？

鄭：唉，無辦法。我們又遲了，如果去年11月所有山頭搞掂，現在還可以爭取，這至少是曾蔭權的政策嘛，開放大氣電波，會校大功率，再搞隧道。但如今梁振英做，佢唔校細你都算夠運喇。不過今年七條隧頭都會收到了，政府已撥款四千萬，不過私營隧道睬你都儍喇。

蘋：你說過，港鐵若要裝天線，每個站要收一百萬？

鄭：港鐵裝天線要收我6,000幾萬，邊個畀呀？我們送了二萬幾部數碼收音機給全港的士、小巴，單單是送機，花了600萬，另外幾個數碼台就無人肯夾錢，因為港台沒有錢，我叫新城、鳳凰每邊夾200萬，他們死都唔肯夾，結果我送的機就閹了他們兩個（新城、鳳凰），但有得聽港台。李嘉誠咁有錢，我無理由送畀佢！霍建寧同我講：「喂，我哋有 FM㗎。」其實佢知的士佬梗係聽我，唔通聽佢哋咩！咁佢咪短視囉。

蘋：大班，你是否預了梁振英會對付你？

鄭：咁梗會㗎喇，但希望是善意對付，而不是用東廠西廠，拆我間屋都無所謂，唔好搞我就得。

蘋：但近日發生的事，也很可怕！

鄭：佢擺明清算曾蔭權，但他打開了潘朵拉盒子，他自己也會死，大家掟完曾蔭權，當然掟你。

蘋：這麼說，這個是陰謀了？

鄭：梗係喇！不是巧合，西九聆訊就有曾蔭權澳門遊，陳冉事件就有夏威夷套房，近期民望跌又來了這一單，次次都有。他也認為西九事件是曾蔭權整蠱佢嘛！咪報仇囉。另外，還要打散公務員這座大山，把最叻兩個公務員曾蔭權、許仕仁打下來，其他公務員咪抬唔起頭，咪聽佢話囉。

「曾走了就天下太平」
蘋：你開咪時說，黃永跟羅范有協議，所有政策都在商台公佈，不能坐大 dbc。聽你每朝在鬧， dbc是否變成了反梁基地？

鄭：嘩，你千祈唔好咁講，會死人執笠㗎！（蘋：這是條問題）唔係呀，哈哈！我支持梁振英！支持佢民生政策㗎！（蘋：但他會做嗎？）他做不到我自然會郁佢！但我家無郁佢，我仲打隻好牌畀佢上，如果佢搞掂九倉平租海運，我實讚佢！這是疑中留情嘛。六四那些我當然不支持，但民生政策我很支持他。

蘋：你幾乎天天罵他（鄭：哈，我邊有，我鬧曾蔭權多啲），有一晚鄭家富接了18通 phone in，全部都說不支持梁振英做特首。

鄭：哈，我都唔明係咪做媒嘅！喂，你唔好害我，我話你聽點解。我對梁振英民生政策是支持的，我真心希望他做到。點解所有罵梁振英的都打來？因為沒有渠道嘛，這是物以類聚，又是選擇。其實打給鄭家富的電話比我更多，我又有死穴，這個阿哥（曾）仲有24日，他走了就天下太平了。

蘋：很巧合，你封咪八年，剛好又是曾蔭權上台的八年。

鄭：哈，這是命！不過如果我在（開咪），我會影響到他。過去八年，傳媒少了監察。不是我自大，但如果我還在開咪，領匯未必能這樣橫行，因為我講的全中！我講過：加租、趕絕家庭生意、賤賣資產，還有一項是拆骨，但他們不會拆了，我只有一項不中。如果我在開咪，政府不敢亂來，因為多了監察。

蘋：你意思是搞成咁，傳媒責任好大？

鄭：梗係大喇，當年有報紙叫人買雷曼㖭！

蘋：但同時政府打壓傳媒又打得好犀利，以往還有兩支咪，但現在都沒有傳媒敢罵了。

鄭：因為大家睇到我倆的下場嘛！哈哈。

「煲呔有做嘢，係個人衰啫！」
蘋：人人說你是「煲呔針」，你又說曾蔭權是你死穴，那《蘋果》讓你公道一點評論他吧！

鄭：這七年，香港失業率、經濟有進賬，他開放大氣電波，發三個電視台牌，又找余若薇辯論，這都是風氣，將來「高佬梁」要搞甚麼，我就挑戰他出來辯論。其實曾蔭權在每一方面都有做事，佢係個人衰啫。衰在咩呢？衰在寸，佢同我一樣無朋友。

蘋：他不只寸，還 cheap及貪小便宜吧？

鄭：公務員個個都係咁㗎。否則不會駕 AM車去買餸喇！住總統套房？阿董都係住總統套房㗎。

蘋：坐私人飛機又如何？

鄭：呢啲咪契弟囉，交友不慎。但我不想批評他，變成落井下石，我又不想幫他講好話。所以人家要鬧我，鬧到夠。不過如果我做電台期間而他發生這些事，我一定要鬧佢，無得揀。算喇，我講你聽但不要寫喇（按：關掉錄音機後大班再談了他對曾的看法）。

蘋：話題回到電台， dbc開播後如何？

鄭：近日有傳我們減人工，其實我們是把一些節目 cut了，因為節目不夠好，我們資源不足夠提供最優秀的節目，所以二台及四台停播了。但我敢講，我們一台（大聲）的節目，由朝早到半夜一點節目，所有節目都是好聽的。不只是講節目，還要講人。我敢說，大聲台是全港最好聽的電台，每一個時段都好。

蘋：你要自詡第一，我不反對，但你們最好，是否因為其他台差了？

鄭：我們鶴立雞群，哈哈！為甚麼我們支持開放大氣電波？港台是百年老店，商台過半百了，新城也二十幾年了，現在完全無競爭。新城尤其不用說了，他們不是靠電台掙錢，他們憑電台去搞活動掙錢；商台是 market leader，毫不長進，但我們開台了他們也在改革，剛公佈把李慧玲調去做晨早節目，證明了我對他們有威脅！

「因為後生仔唔掂！」
蘋：商台變陣對付你，這場仗你怎麼看？

鄭：我未驚過！哈哈，因為黃永太屎吖嘛，佢成日想學我，但又唔掂，咪調個最有份量的來打我囉。

蘋：李慧玲咁難聽，都算有份量？

鄭：喂，你講㗎咋！佢咁調，我歡迎，祝佢好運囉。其實商台都嘗試過，但好多人不明白做電台是難的，就是因為過去沒有競爭。過去八年，商台嘗試造一個人出來代替我，但都係無！完全無法代替我，不是我叻，而是因為無人才。你上星期訪問「皇上」（黃洋達）都有提到陳景輝，我真的希望做到一個第四台出來，代表到八十後的，但佢來做了少年大班、少年周融，我嫌佢唔夠激，仲 mild過我，咁我使乜搵你？我現在找了鄭家富、鄺穎萱旁晚做《十級自由 Phone》，呢啲人咪掂囉！其實我對兩個輝哥（林輝、陳景輝）好失望，不是因為他們不夠激，而是太老成，他們是八十後的建制派。

蘋：你怎回看那次事件呢（按：打入直播節目直斥主持陳景輝）……

鄭：我對他們好大寄望，全香港邊有人會請佢哋吖，我畀好多錢佢哋，無刻薄，不停訓練佢，想佢另有風格，而不是似我，我66歲喇！我想他們開展到一個年輕人的台，而不是網台，網台粗口爛舌。但如果八十後係咁，我做都得喇。點解軟硬天師咁掂？森美小儀咁掂？因為後生仔唔掂囉，呢班人四五十歲㗎喇。麥潤壽五十幾，我以前成日笑佢扮仔，但我家唔敢笑！因為原來班後生唔掂。嗱，講番件事，我一早看到網絡二十三條，我同阿輝講：「 D&G你走寶，作為天星、皇后的社會運動家， D&G應該係你去發動，而唔係《蘋果》去發動，原來佢哋唔上網㗎！ D&G係我話佢聽㗎。跟住，可樂（759事件）都係你哋議題，你應該落去帶動個運動嘛！但佢哋無觸覺，我話：求你，以後唔該上網！例如近日九倉（平價續租海運），我拿住就唔放！當年老懵董打算在禮賓府替鍾士元擺八十大壽，《蘋果》只當花邊新聞，我一看就火起，你有乜資格用港督府來替個老人擺酒？我一講，咪取消囉。做電台，就係要參與嘛。

「唔參與做唔到電台」
蘋：其實你係黃洋達師父，你一早就將社運與節目結合。

鄭：梗係喇！我一開始點揚名立萬呢？1995年2月，我打開《南早》見到東華三院搞籠屋，火起！當年已經講緊籠屋唔掂喇，你東院仲搞？結果我帶了記者去籠屋，再挑戰東院，話同佢哋在籠屋瞓一晚，《風波》是這樣開始的。你一定要落區，你唔參與做唔到電台。網絡二十三條我一早提了阿輝：你要做喇，搞大佢喇！佢先後知後覺。當日 dbc不可能同意何秀蘭、湯家驊的修訂，你畀佢講完點都要鬧佢兩句，但女主持即刻話唔撈，咁兩條儍仔畀佢撩起了。其實佢後悔，點解？後來我同佢上《十級自由 Phone》，佢逼我認打入去第二個電話係錯。如果我認錯，佢就會留。

蘋：他是入錄音室前，跟你這樣說條件？還是說……

鄭：無！但我知，我幾十歲人，我已看到他們有悔意。但同教仔女一樣，我不能縱容。
蘋：但你始終認為打入去罵主持，沒有問題？

鄭：沒有問題，乜叫做破舊立新？其實當年俞琤有入來錄音室講嘢㗎，我只是秉承這個。

蘋：你在大氣電波，公開說他們是電台界的陳鑑林，這不是太傷人嗎？

鄭：咁唔係，我都係鼓勵佢！之後，雖然他寫文章說不會好似我咁鬧人，但翌日開咪講網絡二十三條，佢鬧到人成隻狗咁！我係刺激咗佢，佢鬧足一個禮拜㗎，咁咪啱囉。他們弊在成名太早！好惋惜，返工六個月，我畀咗成組人一百萬。他們都是阿清（游清源）找回來的，我本不認識他們，我叫他們找朱凱迪、找周澄、陳巧文，但他們真的有門戶之見，死都唔肯搵，都係小圈子來。

蘋：我記得你們試播時，記者訪問你跟游清源，你們還說 dbc成功要看大晒台（八十後），大晒台成功 dbc就成功，但說這話的游清源已離開，大晒台又停播了，你不覺得自己眼光不好嗎？

鄭：唏，他們是阿清找回來的嘛！哈哈，但我係點呢，我信阿清嘛，我又真係唔識年輕人，有代溝嘛，他們反高鐵，我是支持建高鐵的嘛。立場不同，阿清話啲人正，我咪信佢囉，我真係唔識佢哋！

Ref.: http://hk.apple.nextmedia.com/supplement/culture/art/20120612/16416964