小強國人

中聯辦宣傳文體部長郝鐵川日前發表文章，提到港人對內地人打尖、喧嘩、不文明行為有所不滿，佢表示大家都經歷過不文明的時代，台灣及香港遊客早30年一樣好惡頂，假以時日，內地人會改變，大家要有包容之心，讓世界充滿愛。

問題係包容真的可以改變內地人不文明行為嗎？佢哋係因為社會發展水平落後，以致出現不文明行為，定係共產黨管治下，欠缺公民意識，道德敗壞所致？

不文明行為　禍根在教育

香港人認識內地人不文明行為，並非始自今日，少年時回鄉，對廣州車站、流花賓館一帶蹲坐地上，一邊煲煙一邊「咔吐」的行為，一直看不過眼，轉眼30年過去，有否進步過？五講四美橫額在八十年代掛滿全廣州，要講文明、講衞生、講禮貌，30年過去，無疑衣着已非藍、綠、灰三色解放裝，女士穿上豹紋leggings、手挽LV，男士腳踏Gucci、用iPhone5，大大聲講電話。但普羅大眾的精神面貌，又何曾改變過。有人認為此乃中國人小農DNA，冇公德心問題，而我相信係共產黨管治的社會出咗問題，變成一個冇道德、私心掛帥嘅強國人。

大家只要打開強國中小學教科書，就會知道點解，因為今時今日內地只有愛國主義國民教育，而冇公民教育，中小學年代培育所謂三好學生、紅領巾少先隊，全部係假到唔恨嘅老積小老頭，唔單止冇晒童真，連做人基本價值觀都有問題，只集中灌輸一種競爭意識，比人叻、比人跑得快。在內地人眾多不文明行為中，其中一款郝鐵川冇提到，而我認為係最恐怖嘅「冇家教」，細路在公眾場合亂來，喪玩喪叫，冇規冇矩，大人視若無睹。在快餐店、酒樓、地鐵、商場、尤其係搭飛機，最怕遇上強國細路坐附近，全程想靜一靜都難。此現象一代傳一代，1949年後出生的第三代強國小朋友長大後，你認為會有教養、有公德嗎？我認為比1949年前出生一代更差，唔單止會冇改進，而且一代不如一代。

愛國愛港者，不妨自己思考，一個國家究竟送太空人上月球犀利，定係能培育出有教養下一代犀利？XYZ，一個國家可以容許將活生生動物製成鎖匙扣，而父母亦會買畀細路做玩具，呢款小強國人長大後，會用何種態度面對地球環境及其他物種。10年前沙士由廣東傳畀香港，死咁多人，廣州人今日仍然繼續食紅炆樹熊、夜遊鷹燉湯，你話呢班係乜嘢人？「包容」可以令佢哋改變嗎？可以令沙士唔再由野生動物傳人再傳過來香港嗎？

共產黨一如「廣西暴龍哥」，一邊開兩會講法治，一邊「國保」流氓痛打香港記者，比八十年代胡耀邦、趙紫陽更大大倒退。當口口聲聲叫包容時，有否想過中港之間矛盾，係因為內地唔單止冇進步，而且仲不斷後退，先至會製造出新一代小強國人。佢哋成長在大國崛起集體亢奮環境，接受共產黨狹隘之愛國主義教育，一孩政策下一切以我為主，冇價值信念。近20年中港兩地社會分途而行，香港中產下一代與小強國人之間鴻溝，比上一代將更大。

「讓世界充滿愛！」根本就係唔科學嘅唯心主義提法。

添馬男

Ref.: Apply Daily