記憶硬體

報載，港人記性普遍不好，其中原因有說是睡眠不足，亦可能是生活緊張，壓力太大所致。若論善忘，啱啱出爐嘅經典示範係四叔， 3.25嗰日，佢一投完票就被記者追問，到底投咗畀邊個？而佢嘅答覆就係已經唔記得咗！話晒佢都真係一把年紀，所以記性差啲都可以理解，亦怪不得佢啲仔要係咁搏命造人，生多幾個孫出嚟。因為可能佢呢頭抱完孫，轉頭就唔記得咗，所以又催促啲公子再嚟過。

忘了自己做過乜嘅亦有劉慧卿和何俊仁，不過 22個月前嘅 2010年的 5月 24日，中聯辦副主任李剛（還好不是那位兒子開車撞死了人，還口出狂言的保定市公安分局副局長）就政改方案與這兩位民主黨核心成員再加上張文光會面。當時中聯辦與民主黨會面三小時後，在中環四季酒店舉行記者會，雙方統一口徑此為破冰之旅。如果英哥前天個半小時的會面是跪拜，或如卿姐怒斥是縱容中聯辦在港「張牙舞爪」，未知當日雙倍時間見面，並獲副主任高度讚揚的會議和該黨「不認同公投、不參加公投」的立場，最後更以中央對「改良方案」開綠燈換取白鴿投誠的一役，是否應以「為虎作倀」形容？

淑女呃人　煲呔當奴
忘了自己講過乜嘅，又有一位葉太，佢同周梁喺早兩晚港台英語節目 Blackchat......Sorry, should be Backchat中駁火，更被對方踢爆，佢向自由黨拉票時講過：「梁振英會害人，我唔會害人。」不過家陣就仆倒去向個害人精「撈」。而葉太堅稱自己應該只是引述傳聞，再辯說已不記得嗰陣的說法。雙方各執一詞，之後在商台《左右大局》再對質，淑女只能乏力招架。英哥會唔會害人，學淑女舊時咁話，可以放長雙眼睇；至於淑女會唔會呃人，你話呢？

不過論記憶衰退嘅嚴重程度，我諗都應該係煲呔，佢直情好似唔記得咗自己仲係現任特首。同英哥會面時，一開口就故作親切嘅稱呼已見突兀，然後會議嗰陣嘅表現，十足十佢返京述職，正襟危坐再加神情凝重，係爭在冇攞本筆記簿（最近換咗部「哎劈」）出嚟，又唔使佢講普通話都口窒走音。禮賓府話晒仲係主場都尚且如此，往後幾個月都真係唔知佢可以點過。莊閒不分，自慚形穢，幾定是天生奴性導致的失憶症。

記者質問　英哥交戲
相比「當奴」，英哥的記性真係好好多，當然「三不」係佢嘅招牌貨，不過有陣時都要從小處着眼。前日佢本來冇準備答記者問題，但係有個記者大聲喊：「係咪做咗特首就唔答問題啦？」佢就即刻轉身折返，堆笑回應。無時無刻都記掛着苦心經營的形象，隨時隨地都入到戲交到貨，呢啲咪係「記憶硬體」！

盧先亞

Ref.: Apple Daily

說得對極了，超讚!!