打得局長亂出拳

永利街成為保育目標，市建局來一個急煞停，跟住轉軚，聲言不拆永利街，「原汁原味保存」，內裏有甚麼原因？大家都認為與政治有關，但市建局主席張震遠例牌否認。香港特區施政之弊病在此，既定政策可以隨風擺柳，因政治風尚而變，毫無原則。

當然政策亦要講靈活性，不能死牛一邊頸，一成不變，但轉變要有理據，要有邏輯，要經過討論，點可以一個星期之間話變就變，將昨日自己提出之理據打倒，隻字不提呀。林鄭月娥局長人稱「打得局長」，夠硬淨，但硬起嚟，似乎毫無章法，亂咁出拳，立下先例而無周全考慮。唔通張震遠與市建局主動願意改變中區重建計劃，增加蝕本機率咩，當然係要「尊重」林鄭意願而已。

永利街之得以保存，並非當局真正尊重民意，而係受到《歲月神偷》得到柏林影展新世代電影水晶熊獎之影響。可以問一問林鄭局長：（一）如無《歲月神偷》呢齣戲，市建局會否保留永利街？（二）如《歲月神偷》冇在柏林影展攞到獎，市建局會否保留永利街？（三）如《歲月神偷》只係在香港攞到本地電影金像獎或者係台灣金馬獎啫，市建局會否保留永利街？（四）以後如有香港電影以本土街道為背景（例如深水埗舊區街道），又在電影節攞獎嘅話，是否有關街道不重建？（五）如第四條答案係 yes嘅話，請林鄭局長列出邊一啲國際影展會秤先的？乜嘢獎先至會得到考慮？本港影展是否夠資格？是否只有外國月亮圓，歐洲與美國奧斯卡先至得到政府認可？（六）其他地區嘅殘舊街道與永利街有何不同？在古蹟、本土文化氣息方面，有甚麼分別？（七）永利街案例是否適用於其他地區？

左丁山並不反對保育，但講保育最好事先訂立各項準則，例如文物、建築、歷史名人遺蹟諸如此類，由歷史文物及建築專家鑑定，等居民有個揸拿至得，點可以一個星期之內就完全改變口徑 o架？如報紙社論所言，市建局聲譽何在？以後大家去嘈林鄭月娥就得 o架嘞，市建局只係政府馬前小卒，負責孭鑊嘅啫。

（左丁山）

Ref. Link: http://hk.apple.nextmedia.com/