奶粉之亂

梁振英北上取暖，意圖藉中央領導人及部委接見，凸顯自己獲中央大力支持，殊不知京城吹冷鋒，而且仲落大雪，熱面孔遇上了cold shoulder。相信佢自己亦估唔到死在「港人港奶」，而非「僭建謊言」。張曉明公開提出要識換位思考，已經好唔畀面，限奶令之所以令中央火滾，問題不在於針對內地人咁簡單，而係充份反映了梁振英決策思維，中央亦感憂慮。

北京對梁有意見

所謂奶荒，其實係進行洗腦廣告宣傳幾隻奶粉品牌，受廣東省及香港家長追捧，加上代理商及水貨客，零售商抬價而造成panic。梁之民粹政客思維認為可以藉高調平定「奶粉之亂」，顯示自己有執政能力，也維護本土利益，一箭雙鵰。

作為政府決策者應以理性為先，認清問題本質，才決定用最有效方法。梁為急於求成，為提振民望而採取限奶令，政務官已質疑執行上會有漏洞造成擾民，過猶不及。

最近一單南京旅客帶米糊過關被罰，令內地官員更加不滿，認為梁振英不但無能，而且思維有問題。昔日兩屆政府凡涉內地舉措，定必先經港澳辦溝通摸底，講清講楚，絕不會單方面宣佈執行，呢種處理方式張曉明絕對知道，因為佢就係當日港澳辦把關之人。今次梁上京不獲商務部及發改委接見，可能與商務部不滿有關，所以梁在總結行程時，特別表明會再拜訪呢兩個部委，正係知道今次冇得見，事不尋常。

至於佢獲新任主席接見，又有photo call，似獲中央大力支持，其實北京不過是正式介紹新組成的中央港澳工作協調小組成員，包括擔任組長的人大委員長張德江、國家副主席李源潮、國務委員楊潔篪、港澳辦主任王光亞，及中聯辦主任張曉明，梁振英唔係主角。習近平一番「抓緊落實」訓話，衝住梁而嚟，更加耐人尋味。

種種迹象顯示，北京對梁越來越有意見，顯示中央會進一步介入特區內部，而且會過細地抓實務，香港人真係多得梁振英唔少。將來寫香港史之人，定當要將2013年「奶粉之亂」記上一筆。

添馬男

Ref.: Apple Daily