白金五星級標準星河灣酒店

藍戰士食住一等一
21/07/2008

車路士貴為頂級豪門，對於季前集訓住宿極盡講究，早前派出三位代表東來考察，結果選定在廣州期間入住番禺「星河灣」酒店，在澳門期間就住「新葡京」，夠晒派頭。

保安嚴密顯派頭
在廣州期間，車仔代表選擇了遠離市區、位處珠江邊的「星河灣」，可謂非常識歎，該酒店於今年三月開業，是頂級豪華酒店，為迎接車仔巨星，酒店更特別事先準備，保安嚴密得又極盡奢華，尚有一些極之「窩心」的布置，包保車仔眾巨星滿意。車路士入住「星河灣」包起七至十樓四層，近日已清場及全封閉管理，所有出入口都有保安站崗，酒店內六部電梯中撥出兩部為車路士專用，並有專人操作，其他客用電梯不停球隊所住樓層，由房間到餐廳特別開設一條秘密通道，甚至酒店內部職員亦有限制，若非負責接待球隊的工作人員，一律不能進入球隊的範圍，保安嚴密成咁，狗仔隊可以死條心！酒店為迎接車路士眾球星，特別在毛巾、浴袍、枕頭套等繡上球員名字，而餐廳內球員座位的座椅套亦是特製印有球員名的球衣款式，夠晒「窩心」。

飲食方面，車路士向酒店開出一份長達十三頁的食譜，詳細列出每餐要求，包括材料、配搭、烹飪方法都埋，為此，「星河灣」根據這份餐單，創出一款新式健康甜品，廣大車迷可以去試。

舞獅表演印埋隊徽
酒店今晨將為車路士到訪舉行一個別出心裁的歡迎儀式，就是舞獅表演，不過這頭獅子並非廣東南獅，而是車路士隊徽的「藍獅」，熱烈歡迎車仔光臨。

Ref. Link: http://football.on.cc/new/20080721/fbnewc0102x0.html

P.S. 傳聞用左七億去起既白金「星河灣」酒店, 當然要去試試啦, 車仔都揀呢間, 梗係正啦, 房間我覺得ok, 好大, 裝修亦好modern, 最好就係d職員, 個個都面帶笑容, 好有禮貌, 值得推介呀!