向廢柴說不

每當有銀行佬打電話黎, 我都唔會理佢講嘜春, 只會向佢大吐苦水, 叫佢幫手取消強姦積金, 試問呢個世界有冇這麼荒誕, 你d錢俾強姦積金佬幫你「投資」, 輸左就你填數, 贏輸佢都有錢落袋, 你唔可以SAY NO, 咁都得!!??


周日趣BLOGBLOG：
向廢柴說不　強迫金齊轉會


上個禮拜剛收到強積金（MPF）保留賬戶年結單，滙豐你好嘢！上一年（6月底結）還有16.8萬元，一年間幫我輸了2.6萬元，幅度約15%，差不多是一年打工仔及老闆供款上限的總和。並不是輸唔起，只不過輸得唔甘心，貼錢買難受。

早前買入的三個基金，第一個名為增長基金，無增長之餘，一年蝕足13%，另外中港股票基金輸19%，亞太股票基金唔見15%。輸錢唔緊要，最慘係表現並非與回報掛鈎。積金局資料，全部基金平均收費1.74%，但滙豐上述三個基金全部收取2%或以上管理費，即係幫我倒完米，我仲要畀多2%多謝你，諗起都犯賤。

多謝Samsung，令我們知道Apple產品並非無敵，一代不如一代。每一個行業都需要有良性競爭才能進步。今時今日強迫金仍屬寡頭壟斷，坊間受託人機構超過廿間，但五大霸主已佔去七成市場份額，當中管理千二億強迫金的滙豐，市場佔有率超過30%，賬戶數目超過70萬，可謂強迫金中的大佬。


回報輸指數　收費又貴
做得大佬，表現同服務卻唔多好。唔睇表現住，齋睇基金管理費，已經較業界平均水平為高。管理最多資產的精選及智選計劃，合共超過900億元，管理費1.8%以上的有13個，涉及資金571億元。滙豐去年首季推出所謂自選計劃，指管理費低見1%以下，但一年過去，九個基金涉及管理資產只有7億元，只係得個樣，僱主不轉用新基金，打工仔變相繼續捱較貴的管理費。有誠意嘅，點解唔直接在原先計劃減價。

至於表現，唔睇還好，越睇得清楚越眼火爆。滙豐強迫金計劃中，恒指基金吸錢最多，資產規模超過210億元。管理恒指基金，按道理只是照單執藥，按比重買齊49隻藍籌已經搞掂晒，唔需要勞煩芬佬你「精心揀股」，滙豐你都收1.38%管理費，一年已收取管理費3億元，貴過行家我都算，但表現真係不知所謂。

根據你寄來的基金概覽，恒指基金由2004年至今，每年都跑輸指數（見表），2004至2007年，恒指正值大升市，滙豐恒指基金卻跑輸恒指2.4至3.1個百分點，2008年及2011年大市回落，你就蝕多咗。成立至今，恒指升6.51%，你就升4.24%。我想知點解你唔直接買盈富基金。

強迫金未收皮，全港市民無得避要焗供，但11月強積金半自由行，打工仔供款的一份可以自己揀選新的受託人，我已決定轉會，向廢柴說不，大家唔好再坐以待斃了。

股榮

Ref.: Apple Daily